नाईट लाईफ'ला बळ; आता महाराष्ट्रात रात्रभर सुरू राहणार दुकाने आणि हॉटेल्स

मद्य विक्री वगळता सर्व व्यावसायिक आस्थापनांना २४ तास व्यवसाय करण्याची मुभा; सरकारचा ऐतिहासिक निर्णय काय? वाचा सविस्तर;

​मुंबई प्रति: दिनांक 1 ऑक्टोबर 2025 रोजी मिळालेल्या अधिकृत माहितीनुसार, आतापर्यंत 'नाईट लाईफ (Nightlife) च्या नियमांमध्ये अडकलेल्या महाराष्ट्रातील नागरिकांसाठी एक मोठी आणि दिलासादायक बातमी आहे. राज्य सरकारने महत्त्वाचा निर्णय घेत, रात्री उशिरापर्यंत व्यवसाय करण्याची परवानगी देणारे बंधन हटवले आहे. महाराष्ट्र दुकाने व आस्थापना (नोकरीचे व सेवाशर्तीचे विनियम) अधिनियम, २०१७ नुसार, मद्यविक्री आणि मद्यपुरवठा करणाऱ्या जागा वगळता राज्यातील दुकाने, हॉटेल्स, रेस्टॉरंट्स आणि खाद्यगृहे आता रात्रभर, म्हणजे २४ तास खुली ठेवता येणार आहेत. उद्योग, ऊर्जा, कामगार व खनिकर्म विभागाने जारी केलेल्या शासन निर्णयामुळे, रात्रीच्या वेळी उशिरापर्यंत काम करणारे कर्मचारी, प्रवासी, पर्यटक आणि विद्यार्थ्यांसाठी जेवण, खरेदी आणि आवश्यक सेवा सहज उपलब्ध होणार आहेत.

​                 रात्रीच्या व्यवसायाचे नियम काय?
​या निर्णयानंतर रात्री उशिरा व्यवसाय करताना खालील मुख्य नियम पाळणे बंधनकारक असणार आहे:
​सेवा अखंडित: हॉटेल्स, उपाहारगृहे, करमणुकीची ठिकाणे आणि मॉल यांसारख्या आस्थापनांना आता रात्री १ वाजता किंवा १२ वाजता बंद करण्याची सक्ती नसेल. ते त्यांचे व्यवहार २४ तास सुरू ठेवू शकतात. कर्मचाऱ्यांची सुरक्षा प्रथम: 'नाईट लाईफ'ला प्रोत्साहन देत असताना, सरकारने कर्मचाऱ्यांच्या हिताकडे लक्ष दिले आहे. प्रत्येक कर्मचाऱ्याला दर आठवड्याला सलग २४ तासांची साप्ताहिक सुट्टी देणे बंधनकारक असेल. कर्मचाऱ्यांच्या कामाच्या पाळ्यांचे नियोजन या नियमानुसार करणे आवश्यक आहे. महिला कर्मचाऱ्यांसाठी विशेष तरतूद: महिलांना रात्री उशिरा (रात्री ९:३० नंतर) काम करण्याची परवानगी देण्यात आली आहे, परंतु आस्थापनांना त्यांच्या सुरक्षित प्रवासाची आणि कामाच्या ठिकाणी पुरेसे सुरक्षित वातावरण देण्याची जबाबदारी घ्यावी लागेल.

​                    यांना रात्रभर मुभा नाही: 

बार, परमिट रूम, डान्स बार, हुक्का पार्लर आणि मद्य विक्रीची दुकाने यांसारख्या आस्थापनांना पूर्वीचेच वेळेचे निर्बंध लागू राहतील. या निर्णयामुळे रात्रीची अर्थव्यवस्था (Night Economy) मजबूत होईल आणि मोठ्या शहरांमध्ये व्यवसाय आणि रोजगाराच्या संधी वाढतील, असा विश्वास व्यक्त केला जात आहे. रात्री उशिरा व्यवसाय करताना, संबंधित आस्थापनांना केवळ महाराष्ट्र दुकाने व आस्थापना अधिनियम, २०१७ चे नियम पाळणे आवश्यक असेल. 

​----------------------------: सुचना :---------------------------------

हे वृत्त शासन परिपत्रक क्रमांक मदुआ-१२२५/प्र.क्र.१५६/ कामगार-१०, दिनांक १ ऑक्टोबर २०२५ रोजीच्या माहितीवर आधारित आहे.​हा शासन निर्णय महाराष्ट्र शासनाच्या संकेतस्थळावर (www.maharashtra.gov.in) उपलब्ध करण्यात आला आहे.

-------------------------------------------------------------------------